चीनको युनान, सिचुआन प्रान्त र योंगनिंग शहरमा मोजो समुदाय बस्छन् । त्यहाँ निकै अचम्मको विवाह हुन्छ जसलाई ‘वाकिङ म्यारिज’को नाम दिइएको छ ।
यो प्रथामा पुरुष महिलासँग एक रात बिताएपछि घर फर्कन्छन् र बच्चा पाल्ने जिम्मेवारी पनि उनीहरूको हुँदैन । मोजो समुदायमा संयुक्त परिवारको चलन छ । परिवारका थुप्रै सदस्य काठको घरमा सँगै बस्छन् । उनीहरू धेरैजसो ठूलो कोठामा बस्छन् जहाँ कसैका लागि छुट्टै सुत्ने कोठा हुँदैन । तर जब मोजो समुदायका छोरीहरू १३ वर्षका हुन्छन् तब उनीहरूलाई एउटा छुट्टै बेडरुम दिइन्छ । उक्त कोठालाई हुफेंग भनिन्छ ।
हुफेंगमा नै वाकिङ म्यारिजको आयोजना गरिन्छ । मोजो युवती यदि कुनै पुरुषसँग आकर्षित भए उनले ती पुरुषलाई आफूसँग रात बिताउन निमन्त्रण दिन्छिन् । त्यसपछि ती पुरुषले राती हुफेंगमा युवतीसँग रात बिताउँछन् र त्यतिबेला उनीहरूबीच शारीरिक सम्बन्ध पनि स्थापित हुन्छ । बिहान हुनेबित्तिकै ती पुरुषले हुफेंग छोडेर आफ्नो घर फर्कनुपर्छ । सुरुमा यस्तो सम्बन्धलाई गोप्य राखिन्छ । युवा र युवती एक–अर्कालाई अशिहाउ भन्छन् । जब उनीहरू दुईजनालाई साँच्चैको मन पराउँछन् तब उनीहरू यस्तो प्रकारको सम्बन्ध बनाउन जारी राख्छन् र आफ्नो सम्बन्धलाई सार्वजनिक गर्छन् । उनीहरू एकअर्कालाई उपहार दिन सुरु गर्छन् । तर पुरुष भने सधैं महिलासँग रात बिताएर दिउँसो आफ्नो घर फर्कनुपर्छ ।
