काठमाडौ, आफ्नो पार्टीलाई सरकारले प्रतिबन्ध लगाएको तथा शीर्ष नेता तथा कार्यकर्ताहरुलाई पक्राउ गरेको विरोधमा चैत १६ गते बन्दको घोषणा गरेको नेत्रविक्रम चन्द नेतृत्वको नेकपाले बन्द फिर्ता गरेको घोषणा गरेको छ । बन्दको दिन एसईई परीक्षा पनि परेको र नेपाल बार एशोसिएसनको निर्वाचन समेत रहेकाले उक्त दलले १६ गतेको बन्द फिर्ता गर्ने निर्णय गरेको जनाएको छ । नेकपाका महासचिव विप्लवले एक विज्ञप्ति जारी गर्दै परीक्षा र बारको निर्वाचनलाई मध्यनजर गर्दै बन्दको कार्यक्रम फिर्ता गरेको जनाएका छन् । विज्ञप्तिमा विप्लवले सरकारका गतिविधि विरुद्ध भने उचित जवाफ दिने चेतावनी दिएका छन् । विप्लवले बन्दको आयोजना गरेपछि
राष्ट्रिय मानवअधिकार आयोगले विज्ञप्ति जारी गरी एसईईको परीक्षालाई असर पुग्ने गरी बन्द हड्तालको कार्यक्रम नगर्न विप्लव समूहलाई आग्रह गरेको थियो ।
