काठमाडौं – राष्ट्रपति विद्यादेवी भण्डारी फागुन १५ गते बैतडी प्रस्थान गर्ने भएकी छिन् ।
राष्ट्रपतिले १५ गते दिउँसो २ बजे त्रिपुरासुन्दरी मन्दिरमा विशेष पूजाआजा गर्ने कार्यक्रम रहेको जिल्ला प्रशासन कार्यालयले जनाएको छ । पूजाआजा पश्चात दशरथचन्द नगरपालिकाले उनलाई नागरिक अभिनन्दन गर्ने कार्यक्रम रहेको छ ।
राष्ट्रपतिले दिउँसो ३ बजे पाटनस्थित भीमदत्त पोलिटेक्निक इन्स्टिच्युटको नवनिर्मित भवन र छात्रावासको उदघाटन गर्ने कार्यक्रम रहेको बैतडीका प्रमुख जिल्ला अधिकारी आनन्द पौडेलले जानकारी दिए । यसका साथै पाटन नगरपालिका र सम्पूर्ण जिल्लावासीको तर्फबाट पाटनमै नागरिक अभिनन्दन गर्ने कार्यक्रम रहेको उनले जनाए ।
यसअघि १५ गते बिहान दार्चुलाको शैल्यशिखर मालिकार्जुन धाममा पनि राष्ट्रपतिले विशेष पूजाआजा गर्ने कार्यक्रम छ । राससका अनुसार राष्ट्रपति भण्डारी पहिलोपटक बैतडी आउन लागेकी हुन् ।
