ब्युरोले नुवाकोट तादी गाउँपालिका-३ खरानिटार घर भई काठमाडौंस्थित तारकेश्वर नगरपालिका-२ काभ्रेस्थली बस्ने गर्ने २२ वर्षीय अर्पण तामाङ भनिने राजु तामाङलाई पक्राउ गरेको हो। उनलाई ब्युरोले सोमबार पक्राउ गरी अनुसन्धान गर्न जिल्ला अदालतबाट सात दिनको म्याद थपसमेत गरिसकेको छ। उनीविरूद्ध साउन २९ गते १७ वर्षीया किशोरीले आफू बेचबिखनमा परेको भन्दै आफन्तसँग उजुरी लिएर ब्युरोमा पुगेकी थिइन्।
बेचबिखन गर्न भनी तामाङले ती किशोरीलाई मायामा फसाएको ब्युरोले जनाएको छ। ब्युरोका अनुसार उनले ती किशोरीसँग विवाह समेत गर्छु भन्दै मायामा फसाएका थिए। पछि तामाङले गोंगबुस्थित फेसबुक गेष्ट हाउसमा लगेर पटक-पटक जबरजस्ती करणी समेत गरे। विवाहको प्रलोभनपछि तामाङले काम गर्नका लागि भन्दै साथीको जिम्मा लगाएका थिए। प्रहरीले उनका साथीको नाम भने खुलाएको छैन। काम गर्ने भन्दै उनी तामाङका साथीसँगै गोंगबुबाट ट्याक्सीमा चितवन गए। त्यहाँबाट नारायणघाट हुदैं काँकडभिट्टा सीमा नाका पुगे। तामाङका साथीले पनि अपरिचित भारतीय पुरुष व्यक्तिको जिम्मा लगाएर नेपाल फर्के। त्यतिबेलासम्म पनि थाहा पाइनन् बेचिँदैछु भन्ने।
ती भारतीय पुरुषले किशोरीलाई अश्लिल भिडियो देखाएर जबरजस्ती गर्न खोजेका थिए। उनले किशोरीलाई धम्की दिदैं शारीरिक तथा मानसिक यातना दिन थालेका थिए। रोजगारीको बहानामा भारतका विभिन्न ठाँउमा लगेपछि उनले आफू बेचिएको महसुस गरिन्। ती भारतीयले नै किशोरीलाई उनलाई किनेको समेत बताए। ‘उनले किशोरीलाई रोजगारीको लागि भन्दै विभिन्न ठाउँमा लगेछन्। त्यसपछि किशोरीलाई शंका लागेछ आफू बेचिएको भन्ने,’ ब्युरोका एक अधिकृतले भने, ‘तामाङले बिहे गर्छु भन्दै बेचेको रहेछ।’
त्यसपछि उनी ती भारतीयको आँखा छलेर भागिन्। भागेर उनी एक अपरिचित नेपालीको सम्पर्कमा पुगेपछि नेपाल फर्किने वातावरण बनेको थियो। उनलाई उद्धार गरी असोज महिनामा कैलालीस्थित टिकापुर इलाका प्रहरी कार्यालयलाई बुझाएको थियो। ‘उनको केही समय अघि नै उद्दार गरिएको थियो। तर, मानसिक तनावका कारण उनलाई मनोपरामर्श सेवा दिइएको थियो। ‘आफूले भोगेका कुराहरू बताउन सकेपछि मात्रै उनी आफन्तसँग उजुरी दिन आइपुगेकी हुन्,’ ती अधिकृतले भने, ‘प्रहरीले यस घटनामा संलग्न अन्य व्यक्तिहरूको समेत खोजी गरिरहेको छ।’
