परासी । स्वास्थ्य तथा जनसंख्यामन्त्री हृदयेश त्रिपाठीले सातवटै प्रदेशमा अहिलेको प्रादेशिक अस्पतालभन्दा सुविधा सम्पन्न अस्पताल निर्माण गर्ने जनाएका छन् ।
पश्चिम नवलपरासीको बर्दघाटमा स्वास्थ्य बीमा शुभारम्भ कार्यक्रममा बोल्दै मन्त्री त्रिपाठीले सात प्रदेशमा अन्तर्राष्ट्रियस्तरको सुविधा सम्पन्न अस्पताल निर्माणका लागि योजना बनाइरहेको बताएका हुन् । ‘एउटा अस्पताल निर्माणका लागि तीन अर्ब रुपैयाँ लाग्ने प्रारम्भिक अनुमान छ ।
सात स्थानमा २१ अर्बको लगानीमा सुविधा सम्पन्न अस्पताल निर्माण हुनेछ,’उनले भने,‘कोरोना रोकथाम र खोप प्रयोजनका लागि ४६ अर्बभन्दा बढी रकम स्वास्थ्य मन्त्रालयलाई आवश्यक भएकोमा सोही रकम बचाएर उपचारका लागि विदेश जान नपर्ने अस्पताल सञ्चालन हुनेछ । ’
अर्को प्रसंगमा मन्त्री त्रिपाठीले स्वास्थ्य मन्त्रालयजस्तो अस्वस्थ मन्त्रालय आफूले नदेखेको भन्दै यसअघिका सबै स्वास्थ्य मन्त्रीहरुको तर्फबाट आफूले माफी माग्नुपर्ने महसुस गरेको बताए । ‘मैले मन्त्रालयमा आएर यसअघिका सबै फाइल अध्ययन गर्दै छु । अस्तव्यस्त मन्त्रालयलाई मैले ट्याकमा ल्याउने प्रयासमा छु । जनतालाई दीर्घकालीन रुपमा फाइदा हुने गरेर स्वास्थ्य संस्था र नीतिगत कामलाई प्राथमिकतामा राखेर काम गर्दै छु ।’ जिल्लाका सात वटै स्थानीय तहमा बुधबारबाट स्वास्थ्य बीमा कार्यक्रम सुरु भएको छ ।
