अव नर्भिक अस्पतालमै अनुहारमा आकृति मिलाउने आधुनिक शल्यक्रिया सुरु

16

काठमाडौं  । नर्भिक अस्पतालले अनुहारको आकृति मिलाउने अत्याधुनिक शल्यक्रिया सुरु गरेको छ। जर्मन र ताइवानबाट विशेष तालिम गरी नेपाल फर्किएका चिकित्सकहरुबाट विभिन्न कारण अनुहारको आकृति असामान्य भएको मिलाउने शल्यक्रिया सुरुवात गरेको अस्पतालले जनाएको छ।

उच्चतम अत्याधुनिक प्रविधिको प्रयोगबाट डा. किशोर भण्डारी र डा. मनीष बज्राचार्यको टिमले यस्तो शल्यक्रिया सेवा दिन सुरु गरेको  नर्भिक अस्पतालले जनाएको छ।

असामान्य देखिने अनुहारको आकृति आधुनिक प्रविधिको प्रयोगबाट शल्यक्रियामार्फत मिलाउने यस्तो सेवा उपलब्ध गराउने नर्भिक अस्पताल देशकै पहिलो भएको अस्पतालको दावी छ।

के हो अनुहारको असामान्य आकृति ?

अनुहारको माथिल्लो र तल्लो हड्डीबीचको सन्तुलन कायम नहुँदा देखिने असामान्य आकृतिलाई फेसियल डिफर्मिटिज भनिन्छ। यसको शल्यक्रियाद्वारा गरिने उपचार विधिलाई अर्थोन्याथिक सर्जरी भनिन्छ।

शारीरिक विकास हुने क्रममा अनुहारका हड्डीबीचको सन्तुलन कायम नहुँदा विभिन्न प्रकारका फेसियल डिफर्मिटिज उत्पन्न हुन सक्छन्।

जस्तै: अनुहारको माथिल्लो भागको हड्डी चाहिने मात्रामा विकास नहुनु, तल्लो भागको हड्डी अस्वभाविक रुपले धेरै विकास हुनु, च्यूडो बांगिएर अनुहारको आकृति असामान्य हुनु, माथि र तलको दाँतको समन्वय नमिल्दा मुख बन्द नहुनु आदि। यसका अलावा बाल्यकालमा अनुहारमा लागेका चोटपटककको सही उपचार नहुँदा पनि युवा अवस्थामा अनुहारको बनावट असामान्य रुपले विकास हुनसक्छ।

कस्तो असर गर्छ ?

यसप्रकारको अवस्थाले गर्दा अनुहारको आकृति असामान्य हुनुको साथै दैनिक क्रियाकलापमा समेत भौतिक र मानसिक असर देखिने गर्दछ। उदाहरणका लागि राम्ररी खाना चपाउन नसक्नु, बोली स्पष्ट नहुनु, बोल्दा थुक बाहिर उछिट्टिनु, अनुहारको मांशपेसीमा अत्यधिक दवाब पर्न गई अनुहारको जोर्नीमा नकारात्मक असर पर्नु, श्वासप्रश्वास नली साँघुरिएर निद्रामा असर पर्नु, अनुहारको असामान्य आकृतिले गर्दा आत्माविश्वासको कमी हुनु आदि।

यसरी गरिन्छ उपचार !

डा. किशोर भण्डारीका अनुसार सामान्यतया यस्तो अपरेशनअघि दाँतमा ब्रेसेज बाँधिन्छ। अपरेशनद्वारा अनुहारको माथिल्लो र तल्लो हड्डीलाई नयाँ पोजिसनमा सारी टाइटेनियम प्लेट्स र स्क्रूले फिक्स गरिन्छ।

सम्पूर्ण शल्यक्रिया मुखभित्रबाट गरिन्छ, जसले गर्दा अनुहारमा कुनै पनि प्रकारको दाग देखिदैन। यस्तो शल्यक्रिया अवधि ४–६ घण्टाको हुन्छ।

शल्यक्रियापछि धेरैमा ३ दिन मात्र अस्पताल बस्नुपर्ने हुन्छ। बिरामीले काम, पढाई वा दैनिक कामबाट १–२ हप्तासम्मका लागि विदा लिनुपर्ने हुन्छ। ६ हप्तासम्म झोलिलो खानेकुरा मात्र खानु पर्छ। शल्यक्रियाको २–३ हप्तापछि ब्रेसेज बाँध्ने काम सुरु हुन्छ। यो प्रक्रिया ६ महिनादेखि डेढ वर्षसम्म जारी रहन्छ ।

नर्भिकमा यस खालको शल्यक्रियामा संसारभरिमै उत्कृष्ट मानिने भर्चुअल सर्जिकल प्लानिङ (भीएसपी) अर्थात कम्प्युटरको सहायताले अनुहारको बनौट निर्क्यौल गरिने आधुनिक तथा उच्चतम प्रविधि प्रयोगमा ल्याएको  अस्पतालको धारणा छ।

LEAVE A REPLY

Please enter your comment!
Please enter your name here