काठमाडौं । जनता समाजवादी पार्टी (जसपा)को अध्यक्ष उपेन्द्र यादव पक्षले अर्का अध्यक्ष महन्थ ठाकुरसहित चार जना नेतालाई पार्टीबाट निष्काशन गरेको छ ।
मंगलबार बसेको बहुमत केन्द्रीय कार्यकारिणी समितिको बैठकले अध्यक्ष महन्थ ठाकुर, वरिष्ठ नेता राजेन्द्र महतोसहित नेताहरु लक्ष्मणलाल कर्ण र सवेन्द्रनाथ शुक्लालाई निष्काशन गरेको हो ।
बालकुमारीमा बसेको कार्यकारिणी सभाको बैठकले उनीहरूलाई औपचारिक रुपमा निष्कासन गरेको नेता इस्तियाक राईले जानकारी दिए । उनका अनुसार निष्कासनको निर्णय सोमबार नै गरिएको थियो ।
यसअघि अध्यक्ष यादवले ठाकुरसहित वरिष्ठ नेता महतो, शुक्ल र कर्णलाई गत जेठ १५ मा २४ घण्टे अल्टिमेटमसहित स्पष्टीकरण सोधेका थिए । तर तीन दिन बित्दासम्म स्पष्टीकरण जवाफ नआएपछि निष्कासनको निर्णय लिएका हुन् ।
गत जेठ ८ मा बसेको बहुमत कार्यकारिणी सदस्यको बैठकले कारबाहीसम्बन्धी सम्पूर्णं अधिकार अध्यक्ष यादवलाई दिएको थियो । यादवले सोही अधिकारलाई प्रयोग गर्दै कारबाही गरेका हुन् । यादव पक्षले प्रधानमन्त्री केपी शर्मा ओली नेतृत्वको सरकारमा सहभागी हुने जुनसुकै नेतालाई पार्टीबाट निष्कासन गर्ने चेतावनी दिएको थियो ।
ठाकुर समूह प्रधानमन्त्री ओली नेतृत्वको सरकारमा जाने अन्तिम तयारीमा थियो। सोमबार मात्रै ओली र ठाकुर समूहबीच मन्त्रालय बाँडफाँडबारे सहमती भएको थियो ।
कार्यकारिकारिणीमा बहुमतमा छन् उपेन्द्र
जसपामा कार्यकारिणी समितिलाई सबैभन्दा शक्तिशाली इकाईको रुपमा लिइन्छ । जसमा उपेन्द्र पक्ष बहुमतमा छ ।
५१ सदस्यीय केन्द्रीय कार्यकारिणी समितिमा यादव पक्षमा ३१ जना सदस्य देखिएका छन् । जसमा ठाकुर समूहतिर जम्मा ३८ प्रतिशत अर्थात् २० जनामात्रै देखिएका छन् ।
पार्टी एकता गर्दा तत्कालिन समय पूर्वराजपा पक्षमा २६ र समाजवादी पक्षमा २५ सदस्य थिए । तर पछिल्लो विभाजनमा पूर्वराजपा समूहका महेन्द्रनारायण यादवसहित ६ जना यादव पक्षमा जोडिएका थिए ।
