हङकङ । कोभिड–१९ द्वारा सिर्जित परिस्थितिको कारण चीन एसियन कप २०२३ आयोजकको रूपमा नरहने जनाउँदै एसियाली फुटबल महासंघ (एएफसी) ले नयाँ आयोजक देशबारे निर्णय गर्ने प्रक्रियामा रहेको बताएको छ ।
प्रत्येक चार वर्षमा भइरहेको यो प्रतियोगितामा महादेशका २४ वटा राष्ट्रिय टिमले खेल्ने गर्दछ र यो दस सहरमा अर्को वर्षको जुन १६ देखि जुलाई १६ सम्म सञ्चालन गर्ने तय गरिएको थियो ।
यो खबर चिनियाँ सामाजिक सञ्जाल वेइबोमा शनिबार ट्रेन्डिङमै रह्यो । उक्त समाचार एक घण्टाभित्रै झन्डै ६ करोडले पढेका थिए । धेरै पाठकले शून्य कोभिड नीतिका कारण अर्को वर्षका लागि प्रतियोगिता सारेको बुझेर सोधेका थिए भने अरूले नयाँ निर्माण गरिएका र मर्मतसम्भार गरिएका १० रंगशाला के हुन्छ भनेर प्रश्न गरे । केहीले फिफा वरीयतामा ७७ औं स्थानमा रहेको धेरै बदनाम भएको पुरुष राष्ट्रिय टिमका लागि राम्रो भएको भन्दै व्यंग्य गरे, ‘अब राष्ट्रिय टिमले सुधार गर्ने पर्याप्त समय पाएको छ । कडा मिहिनेतलाई कायम राख ।’
चीनले महामारीलाई परास्त गर्ने प्रयासमा प्रभावित भएको ठूला अन्तर्राष्ट्रिय प्रतियोगितामा यो एसियन कप सबभन्दा पछिल्लो हो । अघिल्ला महिना एसियाली ओलम्पिक परिषद् (ओसीए) ले बृहत् खेलकुद प्रतियोगिता एसियाली खेलकुद २०२२ पनि स्थगित गरेको थियो, जुन हाङजोउमा आयोजना गर्ने तय गरिएको थियो ।
महामारी सुरु भएयता चीनले धेरै अन्तर्राष्ट्रिय प्रतियोगिता स्थगित वा रद्द गरेको छ । गत फेब्रुअरीमा स्वास्थ्यमा निक्कै कडा निगरानी गर्दै विन्टर ओलम्पिक भने आयोजना गरेको थियो । सन् २०१९ देखि चाइनिज फर्मुला वान ग्राँ प्री आयोजना गरिएको छैन । चिनियाँ खेलाडी पेङ सुईको सरक्षामा गम्भीर हुँदै डब्लूटीए (वर्ल्ड टेनिस एसोसिएसन) ले प्रतियोगिता निलम्बन गरिएको छ । यो वर्ष सांघाई मास्टर्स र चाइना ओपनसहित चार एटीपी इभेन्ट्स चीनमा हुने तालिका थियो ।
चाइनिज सुपर लिगको नयाँ सिजन कहिले सुरु हुने भन्ने अहिलेसम्म घोषणा गरिएको छैन । यो जुलाईमा हुने इस्ट एसियन च्याम्पियनसिपको आयोजना अधिकार पनि सीएफएले पाएको थियो, जुन प्रतियोगिता अब जापानमा हुँदै छ ।
