राजधानी कोलम्बोमै तेल भर्न लाम बसेका गाडीको लाइन ५ किलोमिटरभन्दा बढी छ । यसैबीच बीबीसी पाकिस्तान र अफगानिस्तान संवाददाता सिकंन्दर किरमानीले दस दिनेदेखि पेट्रोलको लाइनमा बसेका एक मिनीबस चालकसँग कुरा गरेका छन् । दस दिनदेखि लाइनमा रहेका ४३ वर्षीय प्रथम भन्छन्, ‘म गत बुधबारदेखि गाडीमै सुतिरहेको छु । निकै कठिन छ तर के गरुँ । मैले पूरा ट्यांकी तेल पनि पाउनेवाला छैन ।’

^{तस्बिर : बीबीसी हिन्दी}

श्रीलंकामा राजनीतिक र आर्थिक संकट गहिरिँदै गएको छ । महँगी ५० प्रतिशतसम्म बढेको छ । राष्ट्रपति राजापाक्षले मुलुक छाडेर भागेका छन् । व्यापक विरोधपछि उनले मुलुकबाहिरबाटै राजीनामा दिएका छन् । कतिपयले कोरोना महामारीका कारण पर्यटन उद्योग धराशयी भएको र फलस्वरुप अहिलेको संकट निम्तिएको बताउँछन् । तर अर्थविश्लेषकहरू भने सरकारको आर्थिक नीतिका कारण संकट निम्तिएको बताउँछन् । न्यून विदेशी मुद्रा सञ्चितिका कारण तेल र औषधिजस्ता अत्यावश्यक सामग्री आयात गर्न पनि कठिन भएको छ ।

^{तस्बिर : रोयटर्स}

बढ्दो संकटका बीच नयाँ प्रधानमन्त्री र राष्ट्रपतिका रूपमा को आउँछन् भन्ने पनि आम चासोको विषय बनेको छ । कार्यवाहक राष्ट्रपति रनिल विक्रमासिंघे नयाँ नेताका रूपमा आउने सम्भावना छ । तर श्रीलंकाली नागरिक भने उनलाई ‘दोस्रो राजापक्ष’ का रूपमा हेर्छन् । यसै हप्ता विक्रमासिंघे राष्ट्रपतिका रूपमा निर्वाचित हुने सम्भावना पनि छ । तर प्रदर्शनकारी भने उनलाई स्वीकार्ने पक्षमा छैनन् ।

प्रमुख प्रतिपक्षी दल समाजी जना बालावेगाया (एसजेबी) का नेता सजित प्रेमादासाले आफू नेतृत्व लिन तयार रहेको बताएका छन् । आगामी जुलाई २० मा संसद्मा राष्ट्रपति पदका लागि मतदान हुनेछ । प्रेमादासा सन् २०१९ को राष्ट्रपति निर्वाचनमा पराजित भएका थिए । गत अप्रिलमा महिन्दा राजापाक्षले राजीनामा दिएपछि प्रधानमन्त्री बन्न प्रेमादासालाई प्रस्ताव गरिए पनि उनले इन्कार गरेका थिए ।

^{तस्बिर : रोयटर्स}

विदेशी मुद्रा सञ्चिति रित्तिँदा श्रीलंका स्वतन्त्र राष्ट्र भएयता (सन् १९४७) कै गम्भीर आर्थिक संकटबाट जुझिरहेको छ । जसका कारण बजारमा अभाव र मूल्यवृद्धि अकासिएको छ । सर्वसाधारणको दैनिकी कष्टकर बनिरहेको छ । विद्यालय, स्वास्थ्य संस्था तथा सरकारी कार्यालयको सेवासमेत प्रभावित छन् । मुलुकको यो अवस्था सिर्जना हुनुमा राष्ट्रपति राजापाक्ष र निवर्तमान प्रधानमन्त्री महिन्दा राजापाक्ष जिम्मेवार रहेको भन्दै जनता गत अप्रिलदेखि सडकमा उत्रिएका छन् ।