काठमाडौं । चर्चित रकस्टार तथा अभिनेता रविन तामाङको निधनमा नेपाली संगीत र फिल्म क्षेत्र स्तब्ध बनेको छ । मंगलबार राती निधनको खबरसँगै यो क्षेत्र शोकमा डुबेको छ ।
संगीतकर्मी, अभिनेता, सांसद र हितैषीले सामाजिक संजालमार्फत तामाङसँगको क्षण स्मरण गर्दै श्रद्धासुमन व्यक्त गरिरहेका छन् । रकस्टार अभया सुब्बाले रविनको निधनलाई एक युगको अन्त्य भएको बताएकी छन् ।
सबैभन्दा पहिलो पपगायक सविन राईले रविनप्रति श्रद्धाञ्जली व्यक्त गर्दै फेसबुकमा स्टाटस लेखेका थिए ।
उनी निकट अभिनेता कार्मले गायक तामाङसँगको पछिल्लो भेटको क्षणलाई स्मरण गर्दै तस्वीर सेयर गरेका छन् । रेड पिटरको अन्तिम शोका लागि पछिल्लोपटक बज्र नाटक घरमा भेटेको र आगामी साता पेरिसमा भेट्ने योजना बनाएको उनले उल्लेख गरेका छन् ।
राष्ट्रिय स्वतन्त्र पार्टीका सांसदद्धय सुमना श्रेष्ठ र असिम शाहले पनि तामाङको निधनमा शोक व्यक्त गरेका छन् । ‘रविन दाई तपाईंलाई हामी एकदमै मिस गर्छौ । रबिन दाईले नेपालको संगीत क्षेत्रमा एक युगलाई परिभाषित गर्नुभयो । हामीले एक प्रतिभाशाली संगीतकार र रत्नलाई गुमायौं’ सांसद श्रेष्ठ लेख्छिन् ।
हरिवंश आचार्य, निमा रुम्बा, संजय श्रेष्ठ, राजेशपायल राई, मंगोलियन हार्ट, कबवेभसहितका कलाकार र ब्याण्डले पनि रविनको निधनमा सामाजिक संजालमार्फत समवेदना व्यक्त गरिरहेका छन् ।
