काठमाडौं । स्वच्छ, खुल्ला टुँडिखेलको लागि नागरिक सचेतना तथा जनदबाब अभियानले काठमाडौंको खुलामञ्चमा खेल मैदान बनाउन लागेको विषयप्रति चासो देखाएको छ । अभियानले आइतबार विज्ञप्ति जारी गर्दै पछिल्लो समय खुलामञ्चमा दुईवटा फुटबल ग्राउन्ड निर्माण गर्न लागिएको जानकारी प्राप्त हुन आएको जनाएको हो ।
अभियानले टुँडिखेल प्रतिदिन मासिँदै गएकोमा चिन्ता समेत जनाएको छ । सन् १९६७ मा ५२ प्रतिशत सार्वजनिक खुला क्षेत्र भएको टुँडिखेलको भूभाग क्रमशः सन् १९९० मा ३३ प्रतिशत, सन् २००० मा २५ प्रतिशत र सन् २०१७ सम्म आइपुग्दा १४ प्रतिशतमा खुम्चन पुगेको जनाउँदै अभियानले यसको अतिक्रमण हुने क्रम बढ्दो रहेको जनाएको छ ।
अभियानले खुल्ला मञ्चलाई पहिलाको जस्तै घाँसे मैदान बनाउने प्रयास गरे पनि यसअघि स्थानीय सरकारले ३ तहको भूमिगत पार्किङ निर्माण गर्ने चर्चा समेत भए पनि विरोधका कारण रोकिएको थियो ।
