काठमाडौं । म्युजिसियन दीपक शाक्यलाई निर्घात कुटपिट गर्नेलाई ललितपुर जिल्ला अदालतका न्यायाधीश हरिप्रसाद कोइरालाले ‘उन्मुक्ति’ दिएको घटना बाहिरिएको छ ।
असार ८ गते बिहान ४ बजेतिर भैंसेपाटी घर भएका शाक्यलाई ललितपुरको सानेपास्थित ‘भोकमाण्डु’ रेस्टुरेन्ट नकिजै चार जना मिलेर निर्घात कुटपिट गरेका थिए । शाक्यलाई उनीहरूले बियरको बोतल र हेलमेट प्रहार गरी निर्घात कुटपिट गरेका थिए ।
प्रहरीले कुटपिटमा संलग्न अछाम घर भएका २२ वर्षीय महेन्द्र रावल र कैलाली लम्किचुहा घर भएका २६ वर्षीय धर्मराज खड्कालाई ‘जरुरी पक्राउ पुर्जी’ दिएर पक्राउ गरेको थियो । तर, ललितपुर जिल्ला अदालतका न्यायाधीश कोइरालाले जरुरी पक्राउ पुर्जी सदर नगरेर आरोपीहरूलाई अनुसन्धान गर्नबाट ‘रोक’ लगाएका हुन् ।
ललितपुर प्रहरीले उनीहरूविरुद्ध ज्यान मार्ने उद्योगमा जाहेरी दर्ता गरेको थियो । तर न्यायाधीश कोइरालाले ‘न्यायाधिशले मुलुकी फौजदारी कार्यविधि नियमावली, २०७५ को नियम ५ (२) बमोजिम पक्राउ स्वीकृति दिन मनासिब नदेखिएको’ भन्ने आदेश गरेर पक्राउ परेकाहरूलाई पनि थुनामुक्त गरेका हुन् ।
कुटपिटमा संलग्न मोहन खड्का र कार्बन फरार छन् । खड्का २०८१ जेठ २ मा कीर्तिपुमा भएको ग्याङफाइटमा संलग्न आरोपमा खुकुरीसहित पक्राउ परेका थिए । पछि उनी अदातलबाट धरौटीमा रिहा भएका थिए ।
ज्यान मार्ने उद्योगमा संलग्नहरूलाई ‘उन्मुक्ति’ दिएको भन्दै न्यायाधीश कोइरालाविरुद्ध म्युजिसियन शाक्यले न्याय परिषद्मा उजुरी दिएका छन् ।
आरोपीहरू अनुसन्धानको दायरामा नआएपछि शाक्यले असुरक्षित महसुस गरेर अस्पतालबाट चिकित्सकलाई डिस्चार्ज गरिदिन आग्रह गरेका थिए ।
हेर्नुहोस् न्याय परिषद्मा दिइएको उजुरी
