काठमाडौं । ट्रान्सपरेन्सी इन्टरनेशनल नेपालले नवनिर्वाचित जनप्रतिनिधि र राजनीतिक दलहरूलाई लोकतन्त्रको आवरणमा हुने लुटतन्त्र अन्त्य गर्न आग्रह गरेको छ।
भर्खरै सम्पन्न प्रतिनिधि सभा निर्वाचनको परिणामले नेपाली जनताको सुशासन र समृद्धिको चाहनालाई अभूतपूर्व रूपमा प्रदर्शन गरेको निष्कर्ष निकाल्दै संस्थाले सत्ता र शक्तिलाई निजी वा दलीय स्वार्थमा नभई जनहितमा प्रयोग गर्न ध्यानाकर्षण गराएको हो। अध्यक्ष मदन कृष्ण शर्माद्वारा जारी विज्ञप्तिमा युवा पुस्ताको भावना र संलग्नता अङ्गालेर उदाएको राष्ट्रिय स्वतन्त्र पार्टी (रास्वपा) लगायत सम्पूर्ण राजनीतिक दलबाट विजयी जनप्रतिनिधिहरूलाई बधाई ज्ञापन गरिएको छ।
विज्ञप्तिमा भनिएको छ, ‘कानुनी राज्यको उपहास गर्दै चरम भ्रष्टाचारले देशको अवस्था सोच्नै नसक्ने गरी कमजोर र शिथिल बनाउन जिम्मेवार राजनीतिक दल र प्रतिनिधिहरूलाई पाखा लगाउन सफल यस निर्वाचनले लोकतान्त्रिक प्रणालीमा जनविश्वास थपेको छ।’
नागरिकले दिएको यस अभूतपूर्व जनादेश र विश्वासलाई अब गठन हुने प्रतिनिधि सभा र सङ्घीय सरकारले पूर्ण सम्मान गर्नुपर्ने संस्थाको भनाइ छ। निर्वाचनमा मत माग्दा जनतासामु गरेका बाचाप्रति पूर्ण प्रतिबद्ध रही, कुनै पनि बहानामा विलम्ब हुन नदिई आम नागरिकले सुशासनको स्पष्ट अनुभूति गर्ने गरी काम गर्न संस्थाले सरकारसँग अपेक्षा गरेको छ।
