काठमाडौं । चलचित्र ‘गौँथली’ प्रिमियरमा रुचाइएको छ । सोमबार सिभिल महलमा भएको प्रिमियरमा चलचित्र हेर्नेले मुक्तकण्डले प्रशंसा गरेका छन् ।
नेपाली समाजको यथार्थ कथा भन्दै सिनेमा हेर्नेले चलचित्रको तारिफ गरेका छन् । २०६० को दशकभन्दा अगाडि नेपाली ग्रामिण समाजमा अधिकांश महिलाले भोगेको कथा चलचित्रले उठाएको भन्दै सिनेमाले प्रशंशा बटुलेको छ ।
जानेर/नजानेर सासुले बुहारीमाथि गर्ने व्यवहारलाई सिनेमाले उठाएको र त्यसले घर र जीवनमा पार्ने प्रभावलाई सिनेमामा मिठोसँग देखाइएको भन्दै निर्देशकको तारिफ गरिएको छ ।
चलचित्र हेर्नेहरूले पूरा अवधी ‘गौँथली’ले दर्शकलाई बाँधेर राख्ने बताएका छन् । २ घण्टा २० मिनेट सिनेमा हेरुन्जेल कहीँ कतै झिँझो नलाग्ने र दर्शकलाई अल्छी नलाग्ने भन्दै निर्देशकको तारिफ प्रिमियरमा पुग्नेले गरेका छन् ।
नेपाली समाजको केही समय अगाडिको वास्तविकतालाई टपक्क टिपेर अहिलेका दर्शकमाझ ल्याइदिएको भन्दै सिनेका हेर्न पुगेका कलाकार तथा अन्य क्षेत्रका व्यक्तिहरूले लेखक तथा निर्देशकको खुलेर तारिफ गरेका छन् ।
चलचित्रमा अरुण क्षेत्री र सिम्रन खड्काले गरेको अभिनयको पनि प्रिमियरमा सिनेका हेर्ने सबैले तारिफ गरेका छन् । अटिजम भएको व्यक्तिको भूमिका निर्वाह गरेका अरुण र बुहारीको भूमिकामा रहेकी सिम्रनको कामको सबैले तारिफ गरेका हुन् ।
चलचित्र हेर्न अग्रजदेखि नयाँ पुस्ताका कलाकारसम्म पुगेका थिए । कलाकारहरू कृष्ण मल्ल, रवि डंगोल, जितु नेपाल, निर्देशक दिवाकर भट्टराई, निर्माता रोहित अधिकारी, पत्रकार प्रकाश सुवेदीलगात थुप्रै चिरपरिचित अनुहारहरू प्रिमियरमा पुगेका थिए । उनीहरूले तत्कालीन नेपाली समाजको अनुहार चलचित्रले उतारेकाले सिनेमा चल्नेमा ढुक्क रहन निर्माण टिमलाई आग्रह गरेका छन् ।
कपिल रिजालले निर्देशन गरेको चलचित्र ‘गौँथली’ साउन १ गतेबाट प्रदर्शनको तयारीमा छ ।
भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको चलचित्रमा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सन्जोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीको अभिनय रहेको छ । बाल कलाकारका रूपमा अंशु ओली र प्रिन्स नेपालीले अभिनय गरेका छन् ।
चलचित्रको कार्यकारी निर्माता सरला रिजाल छिन् । निर्माताको रूपमा सुमन गिरी र डा. कपिल रिजाल छन् । इन्दु गिरी, मनिष रिजाल, प्रलय रिजाल र जीवन ओली सह–निर्माताको रूपमा रहेका छन् ।
डा. भोला रिजालको कथा रहेको चलचित्रको पटकथा तथा संवाद लेखनमा निर्देशक डा. कपिलसँगै निश्चल कुँवर, निरज नेपाल र गिरिराज घिमिरेले सहकार्य गरेका छन् ।
गिरिराज घिमिरे मुख्य सहायक निर्देशक रहेको यस चलचित्रमा हरि हुमागाईंको छायांकन, मिलन श्रेष्ठको सम्पादन छ ।
फोटो : विवेक बस्याल
