स्लामाबाद । पाकिस्तानको उत्तरपश्चिमी खैबर पख्तुनख्वा प्रान्तस्थित कोहाट जिल्लामा सोमबार परेको अविरल वर्षापछि आएको बाढीका कारण एउटा घर भत्किँदा कम्तीमा नौ जनाको मृत्यु भएको छ भने १४ जना घाइते भएका छन्।
उद्धार अधिकारीहरूका अनुसार कोहाट जिल्लाको लाची क्षेत्रअन्तर्गत मालगिन गाउँमा बाढीले घर क्षतिग्रस्त हुँदा त्यसमा रहेका २३ जना भग्नावशेषमा पुरिएका थिए।
कोहाट र काराक जिल्लाका उद्धार टोलीले तत्काल उद्धार अभियान सञ्चालन गरी सबै पीडितलाई भग्नावशेषबाट निकालेर उपचारका लागि नजिकैको अस्पतालमा पुर्याएका छन्।
मृत्यु हुनेमा छ जना महिला र तीन जना बालबालिका रहेका छन्। घाइतेमध्ये केहीको अवस्था गम्भीर रहेकाले मृतकको संख्या अझ बढ्न सक्ने अधिकारीहरूले बताएका छन्।
पाकिस्तानका विभिन्न क्षेत्रमा जारी मनसुनी वर्षाका कारण बाढी र डुबानको समस्या बढ्दै गएको छ। यसबाट पूर्वाधारमा क्षति पुगेको छ भने जनजीवन पनि प्रभावित बनेको छ।
यसअघि खैबर पख्तुनख्वा प्रान्तीय विपद् व्यवस्थापन प्राधिकरण (पीडीएमए) ले नदी तथा बाँधमा पानीको बहाव तीव्र रूपमा बढेकाले आगामी दुई दिनभित्र बाँधबाट थप पानी छोड्नुपर्ने अवस्था आउन सक्ने भन्दै सर्वसाधारणलाई सतर्क रहन आग्रह गरेको थियो।
