काठमाडौं । राष्ट्रिय स्वतन्त्र पार्टीकी सांसद टीका सङ्ग्रौलाले पशुपति आर्यघाटजस्ता स्थलहरूमा विपन्न वर्गका नागरिकले आर्थिक अभावका कारण मृत शरीरको अन्तिम संस्कार गर्नसमेत कठिनाइ भोग्नुपरेको विषय उठाएकी छन् ।
प्रतिनिधिसभाको आजको बैठकको आकस्मिक समयमा बोल्दै उनले राज्यले गरिब तथा असहाय नागरिकका लागि अन्तिम संस्कारजस्तो संवेदनशील विषयमा निःशुल्क वा सहज व्यवस्था गर्नुपर्ने आवश्यकता औंल्याएकी हुन् ।
त्यसतै सांसद बदनकुमार भण्डारीले गत बुधबार काभ्रेपलाञ्चोकको मण्डनदेउपुर नगरपालिका–७ का ६८ वर्षीय केदारनाथ पराजुलीले क्यान्सरपीडित श्रीमती तिलकुमारी पराजुलीलाई पिँठ्युमा बोकेर सुनकोशी नदीमा हाम फालेको घटनाप्रति दुःख व्यक्त गर्दै उनीहरूको खोज तथा उद्धार कार्यलाई उच्च प्राथमिकताका साथ तीव्र बनाउन सरकारसँग माग गरे ।
सांसद शाहजान खातुनले मनसुनका समयमा तराई क्षेत्रमा बाढी र डुबानका कारण बर्सेनि धनजनको क्षति हुने गरेको उल्लेख गर्दै विपद् पूर्वतयारीलाई प्रभावकारी बनाउन सरकारको ध्यानाकर्षण गराइन् ।
सांसद सुशील खड्काले बाँदरको आतङ्कका कारण कृषक चिन्तित बनेको र युवा रोजगारीका लागि विदेशिन बाध्य भएको जनाए ।
बागलुङमा सुन्तलाखेतीको ठूलो सम्भावना रहेको उल्लेख गर्दै उनले बाँदर नियन्त्रणका लागि हेरालुको व्यवस्था गर्न तथा किसानलाई राहत उपलब्ध गराउन माग गरे।
सांसद विश्वराज पोखरेलले पाकिस्तानमा पर्वतारोहणका क्रममा ज्यान गुमाएका नेपालीको शव यथाशीघ्र स्वदेश ल्याउन सरकारले आवश्यक पहल गर्नुपर्नेमा जोड दिए ।
सांसद भीमकुमारी बुढामगरले पहिरोबाट हुने क्षति न्यूनीकरणका लागि प्रभावकारी योजना र कार्यक्रम सञ्चालन गर्न सरकारसँग आग्रह गरिन् ।
सांसद पार्वती विकले सामाजिक सञ्जालमार्फत हुने मानसिक हिंसा नियन्त्रणका लागि आवश्यक कानुन निर्माण गरी प्रभावकारी कार्यान्वयन गर्नुपर्नेमा जोड दिइन् ।
सांसद सागर भुसालले पर्वत जिल्लाको कुस्मा नगरपालिका–गजेडी क्षेत्रमा बाढी र पहिरोका कारण करिब ७० घरपरिवार उच्च जोखिममा रहेको उल्लेख गर्दै धेरै परिवार विस्थापित भइसकेको जनाए । उनले पहिरो व्यवस्थापनका लागि तत्काल प्रभावकारी कदम चाल्न सरकारसँग माग गरे ।
सांसद कमल सुवेदीले सडक दुर्घटना न्यूनीकरणका लागि सडक सुधार, निगरानी वृद्धि तथा ट्राफिक व्यवस्थापनलाई प्रभावकारी बनाउनुपर्नेमा जोड दिए ।
सांसद खगेन्द्र कर्णले सर्पदंशका घटनाको नियन्त्रण तथा उपचार व्यवस्थालाई प्रभावकारी बनाउन आवश्यक नीति तथा कार्यक्रम ल्याउन सरकारसँग माग गरे । सांसद पारसमणि गेलालले कोशी नदीमा आउने बाढीका कारण उदयपुर क्षेत्रमा नदी कटान बढ्दै गएको र स्थानीयवासी त्रासमा रहेको उल्लेख गर्दै विपद् पूर्वतयारी र नदी नियन्त्रणका प्रभावकारी उपाय अवलम्बन गर्न सरकारको ध्यानाकर्षण गराए ।
सांसद यशोदाकुमारी बरालले कर्णाली प्रदेशमा बाढी र पहिरोका कारण यात्रु तथा स्थानीय बासिन्दाले सास्ती खेप्नुपरेको उल्लेख गर्दै जोखिम व्यवस्थापनका लागि प्रभावकारी योजना कार्यान्वयन गर्न सरकारसँग आग्रह गरिन् । सांसद प्रेमबहादुर बयक, क्षितिज थेबे, ठाकुरसिंह थारु, गजाला शमीम मिकरानीले विभिन्न समसामयिक विषयमा धारणा राखेका थिए ।
