नेपाल ल क्याम्पसमा अध्ययनरत विद्यार्थीहरुद्वारा हिजो सोमबार सोही क्याम्पसमा सरसफाई कार्यक्रम सम्पन्न गरेका छन् ।
कार्यक्रम संयोजक सविन पोख्रेलले प्रदर्शनीमार्गस्थित क्याम्पसको एलएलबि दोस्रो वर्षमा अध्ययनरत विद्यार्थीहरुले क्याम्पसमा विधिको शासन र कानूनी सर्वोच्चता कायम रहोस् भन्ने हेतुले सरसफाई कार्यक्रम राखिएको जानकारी दिए ।
सदाको वर्षझैँ यसवर्ष पनि सरसफाई कार्यक्रमलाई निरन्तरता दिइएको जनाइएको थियो । क्याम्पसमा विद्यामान विकृति र विसंगतिलाई पनि बढार्न टेवा पुगोस् भनेर गरिएको उक्त सरसफाई कार्यक्रम राखिएको संयोजक पोख्रेलले जनाए ।
सरसफाई कार्यक्रमको सुरुवात क्याम्पसका क्याम्पस प्रमुख डि एन पराजुलीले झाडु लगाएर गरेका थिए । बिहान ८ः३० मा सुरु भएको कार्यक्रममा दोस्रो वर्षका करिब १०० बढी विद्यार्थीको सहभागीता रहेको थियो । कार्यक्रममा सहायक क्याम्पस प्रमुख सनद देवकोटा, नविन सुब्बा तथा शिक्षक विष्णुमाया भुसाल, विद्यार्थीहरु सुरज सेजुवाल, राजकुमार उप्रेतीका साथै बिएएलएलबिका विद्यार्थीहरुको पनि उल्लेख्य सहभागीता रहेको थियो ।
क्याम्पस नियमित सरसफाई हुनुपर्ने, पार्किङ व्यवस्थित गरिनुपर्नेसहित ५ बुँदे ज्ञापनपत्र पनि सहायक क्याम्पस प्रमुख देवकोटालाई हस्तान्तरण गरिएको थियो ।
