जाजरकोट / गर्भवतीलाई पोषिलो खाना र पहिचान गराउन घरघरमा झन्डा गाडिने भएको छ । जाजरकोटको नलगाड नगरपालिकाले प्रत्येक वडामा रहेका गर्भवतीलाई पहिचान गरी पोषिला खानेकुरासहित घरघरमा झन्डा गाडेर सहयोग गर्ने भएको हो ।
नगरपालिकाभित्र रहेका ४५५ महिलाको घरमा झन्डा गाड्ने निर्णय भएको प्रमुख प्रशासकीय अधिकृत सुरेन्द्र सिंहले जानकारी दिए ।
गर्भवती तथा सुत्केरीलाई स्वास्थ्य अवस्था सुधार गरी निरोगी बनाउन अन्डा उपलब्ध गराइने भएको छ ।
त्यस्तै स्थानीय जातको तोरीको तेल, एक जोडा कुखुराको भाले, पोथीसमेत गर्भवती तथा सुत्केरी महिलालाई उपलब्ध गराउन लागिएको छ । गरिब, दलित, जनजाति र नियमित स्वास्थ्य जाँच गरेको महिलालाई मात्र यो सुविधा उपलब्ध गराइने सिंहले जानकारी दिए । प्रत्येक वडाबाट ३५ जना पर्ने गरी सो सामग्री वितरण गरिनेछ ।
अर्थ अभाव भएकै कारण सुत्केरी भएको समयमा खाना नपाएपछि कुपोषण भएर धेरैको अकालमै ज्यान जाने गरेको दुःखद अवस्थालाई हल गर्न नगरपालिकाले सबै खालका महिलालाई समानताका आधारमा मूल प्रवाहमा ल्याउन विशेष योजना ल्याएको नगरप्रमुख टेकबहादुर रावलले जानकारी दिए ।
उनका अनुसार नलगाड नगरपालिका–२ डाँडागाउँ, ३ कैना, ४ लहँ, ११ चौखा र १२ भगवतीस्थित स्वास्थ्य संस्थामा अनलाइन डाटा सम्प्रेषणका लागि कम्प्युटर र प्रिन्टर वितरण गरिएको छ ।
त्यस्तै सुत्केरीलाई चिसोमा राम्रो स्याहारसुसार गर्नका लागि हिटर वितरण गरिएको नगरप्रमुख रावलले बताए । स्वास्थ्य संस्थामा चिसो मौसममा सुत्केरी हुने महिलाले सास्ती भोग्नुपर्ने बाध्यतालाई हल गर्नका लागि हिटर वितरण गरिएको हो । केही दिनअघि यी स्वास्थ्य संस्थामा सौर्य ऊर्जा वितरण गरिएको थियो ।
अझै पनि सामाजिक चेतनाको अभावले घरमै सुत्केरी हुने, आमा र बच्चाको ज्यानसमेत जोखिममा पर्ने भएकाले यस्तो अभियान थालिएको उनी बताउँछन् । उक्त अभियानलाई प्रभावकारी बनाउन विद्यालय, महिला स्वास्थ्य स्वयमसेविका, आमा समूहलगायत स्वास्थ्य समूहलाई सचेतना कक्षा सञ्चालन गरिने वडा कार्यालयले जनाएको छ ।
कार्यालयका अनुसार बर्थिङ सेन्टरबाट टाढा रहेका र विपन्न गर्भवती महिलालाई निःशुल्क एम्बुलेन्सको सुविधा उपलब्ध गराइने भएको छ । झन्डा अभियानले गर्भवतीले खुलेर आफ्ना समस्या स्वास्थ्यकर्मीसँग राख्न सक्ने स्वास्थ्यकर्मी जनाउँछन् ।
स्वास्थ्यकर्मी रामेश्वर रानाले भने, ‘गर्भवती महिला धेरै लजाउनुहुन्छ, यस अभियानले लाज हटाएर समस्या खोल्न सहयोग गर्नेछ।’ उनले भने, ‘स्वास्थ्य संस्था वा बर्थिङ सेन्टरमै सुत्केरी गराउने यो एउटा सशक्त अभियान हो, सबै गर्भवती महिला स्वास्थ्य संस्थामै पुगेर सुत्केरी भएको तथ्यांक बनाउन पनि सजिलो हुनेछ ।’ नगरपालिकाका प्रवक्ता राममाया हमालले भन्छन्, ‘यो अभियान सबै वडादेखि शुरु भएको र आगामी दिनमा सबैका लागिसमेत हुनेछ ।’
उनले स्वास्थ्य संस्थामा बच्चा जन्माए राज्यले उपलब्ध गराउँदै आएको रु. एक हजार चार सय र न्यानो झोलाबापत एक हजारसहित गाउँपालिकाले सुत्केरी पोषण भत्ताबापत एक हजार दिने भएकाले सबै गर्भवती महिलालाई स्वास्थ्य संस्थामै सुत्केरी हुनसमेत आग्रह गरे । रासस