शुभघाटमा आइपुगेको टोलीलाई नेपाली सेनाको ६ नं बाहिनीपति सहायकरथी लवकुमार रायमाझीसहित विदुर नगरपालिकाको नगरप्रमुख सञ्जु पण्डित, वडा नं १० का वडाध्यक्ष गणेशकुमार नेपाललगायत स्थानीयवासीले भव्य रुपमा स्वागत गरेका छन् ।
नेपाल एकीकरणको क्रममा पृथ्वीनारायण शाहले प्रयोग गरेको मार्गलाई एकीकरण पदमार्गको रुपमा विकास गर्ने योजनाअनुसार गोरखाबाट निकालिएको ‘एकीकरण टर्च’ धादिङको देवीदत्त गणका गणपति सुदीप बानियाँले नुवाकोटको जबरजंग गणका गणपति उदयबहादुर लामिछानेलाई आज मध्याह्न भर्याङ–भुरुङमा हस्तान्तरण गरे ।
नुवाकोटको जबरजंग गणको नेपाली सैनिकले ग्रहण गरेको एकीकरण टर्च’ नुवाकोटको सामरी स्थित पृथ्वीनारायण शाहले बास बस्ने तथा उहाँको सैनिक फौज बसेको पौवामा आएर विशेष कार्यक्रम पश्चात नेपाल एकीकरणको समयमा गोर्खाली फौज हिँडेको पदमार्ग पछ्याउँदै सामरीभञ्याङ, कागुने, डेउडी, राइसिंह, बाघटार, कोलनी, खिन्चेत हुँदै बाजागाजा तथा नाचगान शुभघाट आइपुगेको हो ।