विशाल बजारका क्यामरा व्यापारी अग्रवालको साथबाट १० लाख लुटपाट गरेको आरोपमा असार १० मा अपराध महाशाखाले हवल्दार धिरेन विष्ट र जवान विक्रम चन्दलाई पक्राउ गरेको थियो । महानगरीय प्रहरी परिसर काठमाडौंमा कार्यरत हवल्दार धिरेन परिसर प्रमुख प्रहरी वरिष्ठ उपरीक्षक (एसएसपी) श्यामलाल ज्ञवालीका घुमुवा हुन् ।
सहकारीमा कार्यरत क्यासियर रेणुले दिएको सुराकीको आधारमा हवल्दार विष्ट, जवान चन्द र सौरभले सोही सहकारीबाट निकालेको १७ लाख मध्ये १० लाख रुपैयाँ लुटेको प्रहरी अनुसन्धानबाट खुलेको छ । प्रहरी जवान चन्द महराजगञ्जस्थित गण नम्बर–२ मा कार्यरत थिए । हवल्दार विष्ट महानगरीय प्रहरी परिसर काठमाडौंको सादा पोशाकमा खटिने प्रहरी हुन् । सादा पोशाकमा एसएसपीले आफ्ना विश्वासपात्रलाई मात्र खटाउँछन् ।
