विराट नर्सिङ होममा स्वाब संकलन गरिएका ५० वर्षका पुरुषमा बुधबार कोरोना संक्रमण पुष्टि भएको थियो । तर प्रयोगशालामा टिपाइएका नाम, ठेगाना र टेलिफोन नम्बरका आधारमा प्रहरी र विराटनगर महानगरपालिकाको स्वास्थ्य शाखाको टोलीले आइसोलेसनमा ल्याउन संक्रमितको खोजी गरेपनि भेट्टाउन सकेको थिएन । तर अस्पतालले नै स्वाब संकलन गरी प्रयोगशालामा पठाउँदा नाम, ठेगाना, उमेर र मोवाइल नम्बर गलत राखेको पाइएको छ । स्रोतका अनुसार स्वाब संकलन गरेका व्यक्ति अस्पतालकै अधिकारी थिए । तर उनलाई लुकाउन प्रयोगशालामा स्वाब पठाउँदा विवरण गलत राखिएको थियो ।
बिहीबार प्रहरीले अस्पतालका कर्मचारीलाई केरकार गर्दा अस्पतालले झुटो विवरण पठाएको खुलेको हो । अहिले संक्रमितको पहिचान भएको छ । संक्रमितलाई अस्पताल भर्ना गर्ने तयारी भइरहेको विराटनगर महानगरपालिका स्वास्थ्य महाशाखा प्रमुख रमेश कार्कीले जनाए । जिल्ला प्रहरी कार्यालय मोरङका प्रहरी उपरीक्षक सन्तोष खड्काले बिहीबार बिहान संक्रमितको पहिचान भएको जनाए ।
विराटनगर महानगरपालिकाका प्रमुख प्रशासकीय अधिकृत इन्द्रमणि पोखरेलले अस्पतालले बदमासी गरेका कारण प्रहरी र स्वास्थ्यकर्मीले अनावश्यक दुःख पाएको जनाएका छन् । ‘परीक्षणका लागि कोही कसैको स्वाब संकलन गर्दा नाम, ठेगाना, सम्पर्क नम्बरदेखि सबै कुरामा ध्यान दिनुपर्ने हो,’ उनले भने, ‘अस्पतालले नै बिरामीलाई लुकाउने प्रयास गरेकाे थियाे ।’
