काठमाडौं । विमला चौधरीको गोलमा पहिलो हाफमै अग्रता लिएर पनि नेपालले वुमेन्स एसियन कप २०२२ छनोटको पहिलो खेलमा शनिबार फिलिपिन्ससँग २–१ को हार बेहोरेको छ ।
‘गोलमेसिन’ सावित्रा भण्डारीको अनुपस्थितिमा पनि नेपाली महिला टिम फिफा वरीयतामा ६८ औं स्थानको फिलिपिन्सविरुद्ध जित नजिक पुगेको थियो । तर, अन्त्यतिर दुई गोल गर्दै फिलिपिन्सले २२ वर्षपछिको भेटमा संघर्षपूर्ण जित हात पारेको हो । नेपाली रक्षापंक्तिमा राम्रो समन्वय नभएको फाइदा उठाउँदै फिलिपिन्सले ९० औं मिनेटमा बराबरी गोल गर्यो । पहिलो अन्तर्राष्ट्रिय खेल खेलिरहेकी चान्डलर म्याक्डानियलको क्रसमा तहनाई एनिसले गोल गरेपछि फिलिपिन्स खेलमा फर्किएको थियो । चान्डलरकै चलाखीपूर्ण ‘ब्याकहिल’ पासमा केमिली विल्सनले ९२ औं मिनेटमा गोल गरेपछि फिलिपिन्सले २–१ को जित हात पारेको हो ।
जापानको पहिलो श्रेणीको लिग क्लबमा आबद्ध मुख्य दुई खेलाडीको अनुपस्थितिमै फिलिपिन्सले ३ अंक जोडेको हो । एसियन कप २०१८ मा छैटौं स्थानमा रहेको फिलिपिन्स पहिलो खेलमा जितसँगै जनवरी–फेब्रुअरीमा हुने अर्को संस्करणमा छनोट हुने सम्भावना बलियो बनाएको छ । टोलीले सन् २०२३ को फिफा महिला विश्वकपमा छनोट हुने लक्ष्य बनाएको छ ।
