पोखरा । गण्डकी प्रदेशस्तरीय ब्याडमिन्टन प्रतियोगिताका तयारी पूरा भएको छ । नवौं राष्ट्रिय खेलकुद प्रतियोगितालाई लक्षित गर्दै कास्की जिल्ला ब्याडमिन्टन संघले प्रतियोगिताको आयोजना गर्न लागेको हो ।
चार विधामा प्रतियोगिता सञ्चालन गर्न लागिएको प्रतियोगिताको पुरुष एकल प्रतिस्पर्धामा २९, पुरुष डबल्सतर्फ ४२ टिमको सहभागिता रहनेछ । यस्तै, महिला एकलतर्फ र डबल्सतर्फ ८-८ टिमको सहभागिता रहने प्रतियोगिता संयोजक अमृत पोख्ररेलले जानकारी दिए ।
प्रतियोगिताको पुरुष एकलतर्फ प्रथम हुनेले २० हजार तथा दोस्रो र तेस्रोले समान १०-१० हजार रुपैयाँ पुरस्कार प्राप्त गर्नेछन् । पुरुष डबलतर्फ प्रथम हुनेले ४० हजार, दोस्रोले २५ हजार र तेस्रोले २० हजार रुपैयाँ पुरस्कार हासिल गर्नेछन् । यस्तै, महिला एकलतर्फ प्रथम हुनेले १५ हजार तथा दोसो र तेस्रोले समान १०-१० हजार रुपैयाँ पुरस्कार प्राप्त गर्नेछन् । महिला डबल्सको प्रथम हुनेले ३० हजार, दोस्रोले २० हजार र तेस्रो हुनेले १० हजार रुपैयाँ हासिल गर्नेछन् । प्रतियोगिता गर्न करिब ४ लाख ४५ हजार खर्च लाग्ने अनुमान गरिएको छ ।
