नेम्वाङसहित एमालेका नेताहरू आज नेकपा एकीकृत समाजवादीको केन्द्रीय कार्यालय पुगेर अध्यक्ष माधवकुमार नेपाललगायतसँग भेट्ने कार्यक्रम रहेकाे छ।
एकीकृत समाजवादीको बुधबारको सचिवालय बैठकले ८ दलको समर्थनमा राष्ट्रपति उम्मेदवार भएका रामचन्द्र पौडेललाई मतदान गर्ने निर्णय गरिसकेको छ।
बिहीबार बिहान ११ बजे नेम्वाङले अध्यक्ष नेपालसँग भेट्ने कार्यक्रम तय भएको छ। नेम्वाङसँगै नेता विष्णु पौडेल, पृथ्वीसुब्बा गुरूङलगायत पनि एकीकृत समाजवादीको कार्यालयमा गएर भाेट मागेकाे छ ।
यस्तै राष्ट्रिय स्वतन्त्र पार्टीका सभापति रवि लामिछानेसँग बिहीबार दिउँसो १ बजे बसुन्धारास्थित कार्यालय पुगेर भेटवार्ता गर्ने र राष्ट्रपतिमा सहयोग गर्न आग्रह गर्ने कार्यक्रम तय भएको छ। नेम्वाङसँगै नेता योगेश भट्टराईलगायत रास्वपा कार्यालयमा जानेछन्।
साथै राष्ट्रिय प्रजातन्त्र पार्टीका अध्यक्ष राजेन्द्र लिङ्देनसँग बिहीबार दिउँसो २:३० बजे राप्रपा केन्द्रीय कार्यालय धुम्बाराही पुगेर नेम्वाङसहित नेता योगेश भट्टराईलगायतले भेटवार्ता गर्ने कार्यक्रम छ।
यसअघि अध्यक्ष केपी शर्मा ओलीले राष्ट्रपति उम्मेदवार नेम्वाङलाई भोट माग्दै एकीकृत समाजवादी अध्यक्ष नेपाललगायत शीर्ष नेताहरूलाई पत्र पठाएका थिए।
आगामी फागुन २५ गते हुने राष्ट्रपति निर्वाचनमा एमालेबाट नेम्वाङ र कांग्रेसहित ८ दलबाट पौडेल उम्मेदवार छन्। रास्वपा र राप्रपाले भने राष्ट्रपति निर्वाचनमा कसलाई सहयोग गर्ने निर्णय गरिसकेका छैनन्। यी दुवै दल कुनै पनि उम्मेदवारको प्रस्तावक र समर्थक बसेका थिएनन्।