काठमाडौं । एसियाली पूर्वाधार लगानी बैंक (एआईआईबी)को वार्षिक बैठकमा सहभागी भएर अर्थमन्त्री डा. स्वर्णिम वाग्ले बुधबार स्वदेश फर्किएका छन् ।
कतार एयरवेजको जहाजमार्फत उनी बिहान ८ः४५ बजे काठमाडौं आइपुगेका हुन् । अर्थमन्त्री वाग्ले असोज १० गते एआईआईबीको वार्षिक बैठकमा सहभागी हुन कतारको राजधानी दोहा प्रस्थान गरेका थिए ।
वार्षिक बैठकका क्रममा एआईआईबीको गभर्नर परिषद्का गभर्नरसमेत रहेका अर्थमन्त्री वाग्ले सन् २०२६–२७ का लागि बैंकको उपसभापति (भाइस–चेयर)मा निर्वाचित भएका छन् । क्षेत्रीय सदस्य राष्ट्रमध्येबाट नेपाललाई उपसभापति चयन गरिएको हो ।
नेपाल पहिलोपटक एआईआईबीको उपसभापति पदमा निर्वाचित भएसँगै पूर्वाधार विकासका क्षेत्रमा बैंकको लगानी विस्तार, प्रविधि हस्तान्तरण तथा सदस्य राष्ट्रबीच सहकार्य बढाउन थप अवसर सिर्जना हुने अपेक्षा गरिएको छ ।
पूर्वाधारमा लगानी बढाउन वाग्लेको जोड
एआईआईबीको ‘गभर्नर्स बिजनेस राउन्डटेबल’मा अर्थमन्त्री वाग्लेले पूर्वाधारमार्फत पुँजी निर्माण कम विकसित मुलुकको आर्थिक वृद्धिको महत्वपूर्ण आधार रहेको बताएका थिए ।
उनले सडक, विद्युत्, सञ्चार तथा सूचना प्रविधिलगायत उत्पादनका प्रमुख क्षेत्रमा लगानी विस्तार गर्नुपर्नेमा जोड दिएका थिए ।
नेपालजस्ता मुलुकको आवश्यकता र आर्थिक अवस्थासँग मेल खाने गरी एआईआईबीको लगानीलाई थप सहुलियतपूर्ण बनाउने उपाय खोज्नुपर्ने उनको धारणा थियो । साथै, स्वदेशी तथा विदेशी निजी पुँजी आकर्षित गर्न वित्तीय स्रोतको उपलब्धता सहज बनाउनुपर्ने विषयसमेत उनले बैठकमा उठाएका थिए ।
पुनर्निर्माणमा सहयोगबारे द्विपक्षीय छलफल
वार्षिक बैठकका क्रममा अर्थमन्त्री वाग्लेले एआईआईबीका अध्यक्ष तथा कतार, भारत, बंगलादेश, आर्मेनिया र जर्जियाका अर्थमन्त्रीसँग द्विपक्षीय भेटवार्ता गरेका थिए ।
भेटवार्तामा द्विपक्षीय हित, आर्थिक सहकार्य, लगानी विस्तार तथा नेपालले पछिल्लो समय भोगेको प्राकृतिक विपत्तिपछिको पुनर्निर्माणमा सहयोगका विषयमा छलफल भएको थियो ।
अर्थ मन्त्रालयका अनुसार एआईआईबीको वार्षिक बैठकमा भएको छलफल नेपालको पूर्वाधार विकासका लागि बैंकको लगानी विस्तार, प्रविधि हस्तान्तरण र सदस्य मुलुकबीचको सहकार्यका दृष्टिले महत्वपूर्ण रहेको छ ।
