काठमाडौ, साताव्यापी चीन भ्रमणमा रहेका प्रधानसेनापति पूर्ण चन्द्र थापाले चिनियाँ जनमुक्ति सेनाबाट नेपाली सेनालाई दिने सैन्य सहयोग सम्बन्धी प्रोटोकल सम्झौतामा हस्ताक्षर गरेका छन् ।
चिनियाँ सेनाले दिने भनेको मानवीय सहायता तथा विपद् व्यवस्थापन अन्तर्गतको १५० मिलियन चिनिया अर्थात झण्डै साढे दुई अर्ब नेपाली बराबरको उपकरण सम्बन्धी सम्झौतामा हस्ताक्षर भएको हो । चिनिया पक्षले दिने सहयोगमा हेवी मेकानिकल ब्रिज, रेस्क्यु किट तथा विभिन्न प्रकारका सवारी साधनहरु रहेका छन् ।
चिनियाँ जनमुक्ति सेनाको औपचारिक निमन्त्रणामा असार १ गतेबाट चीनको भ्रमणमा रहेका प्रधानसेनापति थापाले बुधबार केन्द्रीय सैन्य आयोगका सदस्य जनरल ली जुचेङसँग शिष्टाचार भेट गरेका छन् । उनलाई बेइजिङस्थित जनमुक्ति सेनाको एक टुकडीले सम्मान गारत अर्पण गरेको थियो ।
भ्रमणकै सिलसिलामा प्रधानसेनापति थापाले बेइजिङस्थित चीनियाँ जनमुक्ति सेनाको विभिन्न सैनिक संरचनाहरुको निरीक्षण भ्रमण गरेका थिए । उनले ग्रेटवाल लगायत अन्य महत्वपूर्ण पर्यटकीय स्थलहरुको भ्रमण समेत गरेका छन् । औपचारिक भ्रमण समाप्त गरी उनी असार ७ गते काठमाण्डौ फर्कने कार्यक्रम रहेको छ ।
