सर्लाही– गत असार ५ गते प्रहरीको गोली लागेर मृत्यु भएका विप्लव नेतृत्व (नेकपा)का सर्लाही इन्चार्ज कुमार पौडेलको परिवारसँग पत्रकार तथा मानवअधिकारकर्मीको टोलीले भेटघाट तथा छलफल गरेको छ ।
जनपत्रकार संगठन,नेपालका अध्यक्ष प्रकाश डुम्रे र महासचिव हिम विष्ट,अधिकारकर्मी रोहित पौडेलको अगुवाईमा पुगेको पत्रकार र मानवअधिकारकर्मीको टोलीले घटनास्थलको अध्ययन गर्नुका साथै घटनाबारे स्थानीयवासी र परिवारसँग छलफल गरेको हो ।
छलफलका क्रममा पौडेलको परिवारले दोहोरो भिडन्तको नाममा प्रहरीले योजनाबद्ध ढंगले कुमारको हत्या गरेको दाबी गरेका छन्।
कुमारका बुवा खिलकराज पौडेलले आफ्नो छोरालाई प्रहरीले पक्राउ गरेर हत्या गरेर भिडन्तमा मृत्यु भएको गलत हल्ला फैलाएको आरोप लगाए ।
उनले भने, ‘आज मेरो छोराकोमात्रै मृत्यु भएको छैन देशको लागि केही गर्छु भनेर हिडेको देशकै छोरो गुमेको छ, सर्लाहीका गरिब किसान,सुकुम्बासीको अभिभावक गुमेको छ तर सरकारले दोहोरो भिडन्तमा मृत्यु भएको नाम दिईएको छ, यो गलत हो, जनविरोधी र भष्ट्रचारीहरु मिलेर मेरो छोराको हत्या गरिएको छ ।’
कुमारका भाई हरिकृष्ण पौडेलले अहिलेसम्मपनि आफनो दाइको पोष्टमार्टम रिपोर्ट नदिएको जनाए । उनले आफ्नो दाइलाई नियन्त्रणमा लिएर हत्या गरेको र पोष्टमार्टम रिपोर्ट सरकारको दबावमा अस्पतालले सार्वजनिक गर्न आलटाल गरिरहेको गुनासो गरे ।
जिल्ला अस्पताल सर्लाहीले अझै पोष्टमार्टमको रिपोर्ट नदिँदा राष्ट्रिय मानवअधिकार आयोग, इन्सेक, एभोकेसी फोरमले अन्तिम रिपोर्ट सार्वजनिक गर्न सकेका छैनन् । पौडेलका परिवारले सरकारको दबावमा अस्पतालले पोष्टमार्टम रिपोर्ट गलत बनाउन सक्ने भन्दै सहयोग गर्न सबैलाई आग्रह गरेका छन् ।
