काठमाडौं-दाङ लमहीस्थित देउखुरी अन्तर्राष्ट्रिय क्रिकेट मैदानमा भइरहेको प्रधानमन्त्री कप टी ट्वान्टी महिला क्रिकेट प्रतियोगितामा एपिएफले प्रदेश नम्बर २ लाई ८ विकेटले हराएको छ। प्रदेश २ ले दिएको ७३ रनको लक्ष्य एपिएफले १३.१ ओभरमा २ विकेट जाँदा पूरा गरेको हो।
एपिएफका लागि सीता राना मगरले दुई साथै रेखा रावल, करुणा भण्डारी, इश्वरी विष्ट र राजमती ऐरीले एक-एक विकेट लिए। ७३ रनको लक्ष्य पछ्याएको एपिएफका लागि ज्योती पाण्डेले ४० बलमा ३० रन साथै सीता राना मगरले ३० बलमा १८ रन बनाइन्। प्रदेश २ की सरस्वती कुमारी र कविता गौतमले एक-एक विकेट लिए।
यसअघि आइतबार नै भएको पहिलो खेलमा लुम्बिनी प्रदेशसँग कर्णाली ९ विकेटले पराजित भएको थियो। यस्तै शनिबार भएको खेलमा कर्णाली प्रदेश एपिएफसँग २०४ रनले पराजित भएको थियो। शनिबार नै लुम्बिनी प्रदेशले प्रदेश नम्बर २ लाई ९ विकेटले नै हराएको थियो।
