काठमाडौं । नेपाल इन्फ्रास्ट्रकचर बैंक (निफ्रा) को नाफा आक्रामक वृद्धि भएको छ । बैंकले अघिल्लो आर्थिक वर्षको तुलनामा चालू आर्थिक वर्षको दोस्रो त्रैमासमा ७३ प्रतिशतले नाफामा वृद्धि गरेको हो । आर्थिक वर्ष २०७९/८० को दोस्रो त्रैमाससम्म बैंकको नाफा बढेर ७६ करोड ६१ लाख ६० हजार रुपैयाँ आर्जन भएको छ । जबकि अघिल्लो आर्थिक वर्ष २०७८/७९ को सोही अवधिमा बैंकले ४४ करोड २६ लाख ४८ हजार नाफा आर्जन गरेको थियो ।
जसबाट बैंकले दोस्रो त्रैमाससम्म १ अर्ब ३२ करोड ४९ लाख ४८ हजार रुपैयाँ खुद ब्याज आम्दानी गरेको छ । गत आवको सोही अवधिमा बैंकले ८ अर्ब १३ करोड ६४ लाख ७८ हजार रुपैयाँ खुद ब्याज आम्दानी गरेको थियो ।
सम्भावित कर्जा नोक्सानीबापत ४ करोड २५ लाख १४ हजार रुपैयाँ छुट्याएको छ । पुस मसान्तमा बैंकको सञ्चालन नाफा १ अर्ब ९ करोड ४५ लाख १५ हजार रहेको छ । २१ अर्ब ६० करोड रुपैयाँ चुक्ता पूँजी रहेको बैंकको जगेडा तथा सञ्चित कोषमा १ अर्ब ६६ करोड ९६ लाख २० हजार रहेको छ । बैंकले पुस मसान्तसम्म ५७ करोड ७९ लाख ५४ हजार निक्षेप र २ अर्ब २८ करोड २३ लाख १३ हजार रुपैयाँ ऋणपत्रमार्फत स्रोत संकलन गरेको छ । बैंकको प्रकाशित वित्तीय विवरणअनुसार वार्षिक प्रतिसेयर आम्दानी ७ रुपैयाँ ९ पैसा र प्रतिसेयर नेटवर्थ १०७ रुपैयाँ ७३ पैसा रहेको छ ।
