काठमाडौं । राष्ट्रपति रामचन्द्र पौडेलले बोलाएको सर्वपक्षीय बैठकमा प्रमुख प्रतिपक्ष नेकपा एमाले उपस्थित नहुनुलाई एकीकृत समाजवादीका अध्यक्ष माधवकुमार नेपाल आफ्नो पार्टीसँग जोडेका छन् ।
मंगलबार बिहानका लागि राष्ट्रपति पौडेलले बोलाएको सर्वदलीय बैठकमा एमालेका नेताहरु उपस्थित भएनन् ।
राष्ट्रपतिले पदीय भूमिका भन्दा बाहिर गएर सक्रियता देखाएकाले बैठकमा अनुपस्थित भएको एमालेले स्पष्टीकरण दिएको छ ।
राष्ट्रपतिले सबै दललाई बोलाउनुलाई प्रधानमन्त्री पुष्पकमल दाहाल‘प्रचण्ड’ले सकरात्मक कार्य भएको बताएका थिए । राष्ट्रपतिले देशको चिन्ता गरेर दलहरुलाई समझदारीबाट अगाडि बढ्नुस् भन्नु सकरात्मक कार्य भएको प्रचण्डले बताए ।
‘चिन्ता प्रकट गरेर हामीलाई बोलाउनु भयो । यो अत्यन्तै सकरात्मक छ । राष्ट्रपतिले बोलाएको विषयमा विमति राख्नुपर्ने ठाँउ छैन,’ प्रधानमन्त्रीको भनाइ उधृत गर्दै सहभागी एक नेताले भने ।
सोमबार राति दलहरुबीच सहमति भई संसद खुलाउने अवस्था रहेकाले धेरै कुरा नभएको सहभागी नेताले बताए । ‘संसद नखुलेको भए सबैले बोल्थे होला । उपस्थित मध्ये केहीले मात्रै बोले,’ सहभागी नेताले भने ।
