बुटवल । रुपन्देहीको भैरहवामा विभिन्न संस्थाको सहभागितामा शान्ति सद्भाव र्याली निकालिएको छ । जेनजीको प्रदर्शनपछि उत्पन्न असहज अवस्थालाई सहज बनाउने उद्देश्यले नेपाल-भारत सीमा नाका बेलहियादेखि बुद्धचोकसम्म र्याली निकालिएको हो ।
र्यालीमा जेनजी युवा समूह, लुम्बिनी प्रेस क्लब, उद्योग वाणिज्य महासंघ लुम्बिनी प्रदेश, सिद्धार्थ उद्योग वाणिज्य संघ रुपन्देही, चेम्बर अफ कमर्स सिद्धार्थ सञ्जाल रुपन्देही, सिद्धार्थ सार्वजनिक यातायात प्रालि, नेपाल भन्सार एजेन्ट संघ सिद्धार्थनगर, रुपन्देही, सिद्धार्थ होटल संघ, भैरहवा मर्निङ वाक ग्रुप, होटल तथा रेष्टुरेन्ट व्यवसायी संगठन रुपन्देही, पश्चिमाञ्चल यातायात प्रालि लगायतको सहभागिता थियो ।
र्यालीमा बोल्दै प्रमुख जिल्ला अधिकारी डा. टोकराज पाण्डेले रुपन्देहीमा कर्फ्यू आदेश हटाइएको र निषेधाज्ञा पनि क्रमशः खुकुलो बनाउँदै जनजीवन सामान्य बनाइने जनाए ।
उनले जेनजी आन्दोलनका क्रममा रुपन्देहीमा व्यक्तिगत र सार्वजनिक सम्पत्ति तोडफोड र आगजनीमा संलग्नहरूको फोटो, भिडियो संकलनको काम भइरहेको जानकारी गराउँदै त्यस्ता प्रमाण भए प्रहरी प्रशासनलाई दिन आग्रह गरे । तथ्य प्रमाणका आधारमा तोडफोड र आगजनीमा संलग्नलाई कारबाहीको दायरामा ल्याइने प्रजिअ पाण्डेले जनाए ।
नेपाल उद्योग वाणिज्य महासंघ लुम्बिनी प्रदेशका अध्यक्ष कृष्णप्रसाद शर्माले युवाका जायज माग सम्बोधन गर्दै संयमित भएर अगाडि बढ्नुपर्ने जनाए ।
जेनजी युवा सागर ज्ञवालीले सामाजिक सञ्जाल बन्द र भ्रष्टाचारविरुद्ध भएको आन्दोलनमा घुसपैठ हुँदा मानवीय र भौतिक क्षति हुन पुगेको जनाए ।
लुम्बिनी प्रेस क्लबका अध्यक्ष कमल रायमाझीले असहज बनेको जनजीवन पूर्ववत अवस्थामा फर्काउन शान्ति सुरक्षाको पूर्ण प्रत्याभूति दिनुपर्ने आग्रह गरे ।
