काठमाडाैं । दरबारमार्ग स्थित प्लाटिनम क्लबका दुईजना बाउन्सर ‘योजनाबद्ध’ खुकुरी प्रहार गरिएको प्रहरीको अनुसन्धान निष्कर्ष छ । मंगलबार बिहान ४ बजेतिर क्लबको ड्युटी सकेर फर्किएका बाउन्सरलाई खुकुरी प्रहार गरेको आरोपमा प्रहरीले अहिलेसम्म ७ जनालाई पक्राउ गरेको छ ।
भदौ २३ मा क्लबमा बाउन्सरसँग भएको झगडाको कारण आक्रमण गरिएको आरोपीहरुले प्रहरीसँग स्वीकार गरेका छन् । घटनामा प्रयोग गरिएको दुई थान खुकुरी र दुईवटा मोटरसाइकल प्रहरीले बरामद गरेको छ । अनुसन्धानमा संलग्न अधिकृतहरूका अनुसार आरोपीहरुले चुच्चेपाटीको रिकण्डीशनबाट मोटरसाइकल भाडामा लगेर प्रयोग गरेका हुन् । कपनस्थित दावा लामाको डेराबाट खुकुरी बरामद गरिएको छ ।
घटनामा संलग्न मध्येका दोलखाको सैलुङ घर भएका विनोद तामाङ र जीवन तामाङलाई उपत्यका अपराध अनुसन्धान कार्यालयले पक्राउ गरेर प्रहरी वृत सोह्रखुट्टेमा पठाएको छ । जिल्ला प्रहरी परिसर काठमाडौंले रामेछाप घर भएका विकास श्रेष्ठ, दोलखाका प्रदिप लामा, सिन्धुपाल्चोक शिखरपुरका राजेन्द्र कार्की, काभ्रेका जितेन लामा र सिन्धुपाल्चोक बाह्रबिसे घर भएका दावादोर्जे शेर्पा उर्फ च्याङ्बालाई पक्राउ गरेको छ । खुकुरी प्रहार गर्ने ग्याल्जेन लामा अझै फरार छन् । पक्राउ परेकामध्ये विनोद तामाङ घटनास्थलमा देखिएका छैनन् ।
