काठमाडौं महानगरपालिका वडा नं. ५ चावहिलस्थित ज्येष्ठ नागरिक स्वास्थ्य सेवा सहकारी संस्था लिमिटेड र सुकस बचत तथा ऋण सहकारी संस्था लिमिटेडले दर्ता खारेजी स्वीकृतिका लागि महानगरपालिकामा निवेदन दर्ता गराएका हुन् ।
खारेजीको निवेदन परेलगत्तै महानगरपालिकाको सहकारी विभागले आज सूचना प्रकाशित गर्दै यी दुवै सहकारीबाट कर्जा लिएर तिर्न बाँकी रहेका वा बचत नलिएका सदस्यहरुलाई १५ दिनभित्र सम्पर्कमा आउन सूचना गरेको छ । अन्यथा, खारेजीपश्चात् कुनै पनि दाबी विरोधको जिम्मेवारी विभागले नलिने जानकारी गराइएको छ ।
‘उक्त संस्थाले तिर्नुपर्ने दायित्व र उठाउनुपर्ने ऋणसहित बक्यौता केही भएमा तथा यी संस्थाहरुबाट धितो राखी कुनै कर्जा लिएको वा यी संस्थाहरुमा बचत गरेको भएमा कर्जा लिने वा बचत गर्ने व्यक्तिले यसै सूचनालाई आधार मानी सूचना प्रकाशित भएको मितिले १५ दिनभित्र यस विभागमा सम्पर्क राख्नुहुन सूचित गरिन्छ,’ सूचनामा भनिएको छ, ‘अन्यथा खारेजीपश्चात् कुनै पनि दाबी विरोधको जिम्मेवारी विभाग नहुने व्यहोरा जानकारी गराइन्छ ।’
